تخدير، تخدير حتى ننسى التفكير و التعبير..

التخدير و المخدرات من أكثر الأشيء المستعلة، و إلي يستعملها التونسي، و تستعمل عليه، و على انواعها و كثر اشكالها، و لكن العمل الأوحد انها كلها نافعة للتونسي و "على" ال تونسي.. و إلي منها نجمو نخذوه في الإستعمال الطبي، و تبنيج للقيام بالعمليات الجراحية و خاصةً عند هاك الدونتيست و نتفكر هاك الأيام السودة إلي تعدات علينا كل منين كنا صغار..  و كلنا زادة نعرفوا الأنواع الاخرى، كالمخدرات المتمثلة في الزطلة، الوردة البيضاء، البنتاكول. الحبارش.. نتصور من غير تعريف التونسي يعرفهم وحدة وحدة،  معرفة جيدة زادة، إلخدام في تاكسي و حاطت تحتو كعبات و الكوناتر خدام و هو مهوش لهنا، و قيد على الثورة و الحرية و الخدمة بضمير، و إلي في زنقة الحومة ولا في تريح كرة في ستاد يضربلها وحيد مبروم، و يشعل وحدة "فلام" و يرمي زوز دبابز و قيد زادة على "الحرية" و "حرية تعبير"،   وإلي هو و الشختورة متاعو في بواتا يلحولها حريبيشة، و قيد زادة على "حرية المرأة" و التقدم و التفتح،، مش هذا موضوعنا أما،، حصلوا ينعبو الحريا في تونس..!  الحاصيلو الشعب كلو يطايح حيط يهز، و حيط يقعد، كما حالتنا في تونس اليوم، الشعب كلو يطيح و لمش قدر يشد روحو و حيط  يهز و حيط يقعد، و مش داري على روحو وين مشي.. يخا البيرة ولاو يفرقوا فها بلاش بعد الثورة !!؟ هذي خسارة فاتتني ما سمعتش بها..زعمة ؟؟ ملا شنية الحكاية !؟ سؤال يطرح نفسه، كان الشعب موش مخدر باش يبدى يمشي و يطايح ؟؟ بطبيعة الحال لا،  أما نحنا "قابلين" للتخدير و للتمخوير، و لهنا و إلي نحب نحكي عليه إلي هو أخطر أنواع التخدير هي التالية التخدير الإعلامي و تخدير الشعوب..

لأنهم سيضحكون على أي تفسير أخر على ما يحدث فعلاً 

الأعلام، و صحافة و جرايد بدورو هوما أقوى مخدر لشعوب، ملا بن علي كفاش بقا بارك 23 سنة في الحكم، من وراء الإعلام و الصحافة الموجهة.. و تلفزة البنفسجية إلي كانت خدمتها تلميع صورة النظام و تزيف الحقائق، و ما ننسوش هاك الفصايل البنفسجية المرضى بجنون التلحيس و التصفيق..

على مدى 23 سنة، نفس الستراتجية و نفس الإعلام إلي نعرفوه سابقاً رناه اليوم، تزييف الوقائع، و تأثير على رأي العام.. و رينا الكل بعد 14 جانفي، التلفزة اش تحكي، عصابات مسلحة، قناصة.. إلخ إلخ تخويف و التأثير على رأي العام، و اش عبينا منها هاك لغة متع الإقتصاد بش يطيح و بش دخلوا البلاد في حيط.. إلخ إلخ..

لليوم نفس الإعلام و الجرايد بودورو تخدم و تلمع في صلعت سي سبسي، و تزيف الحقائق و التأثير و تخدير الرأي العام، تصوير المتظاهرين في صورة "عصابات ملثمة"  هدفها خراب البلاد و ما عندها حاط روح "وطنية" و عقلنية و بش دخل البلاد في حيط، و على ذكرى هذا و الوطنية و الصحافة الشفافة نحب نبين حاجة بسيطة من الخدمة "بروح وطنية" إلي يخدم فيها الإعلام البنسفجي و جرايد بدورو للتأثير على رأي العام و نقتبس مدونة من مدونات الفن :

http://elfan-i.blogspot.com/2011/05/thf.html

و تونسي الحمدواله يصدق و يبلع ورى بعضو لين رجعنا إلى ما قبل 14 جانفي، حيط يهز و حيط يقعد، التونسي ضايع فيها مش فهم شي، و مش قدر لا يعبر لا يفكر..! و إلي تقولو راهي العزوزة هزها الواد، يا يقولك "اخطى راسي و اضرب" يا "سايب ناس تخدم على رواحها" يا يقلك " العام صابة" أصلاً.. !

تخدير، تخدير حتى ننسى التفكير و التعبير..

ثــــورة شعب خـــوّاف

خمسة أشهر مضوا على "الثورة المباركة"..

خمسة أشهر كانت كفيلة بأن تُثبت لنا أن ما قمنا به يُمكن أن يكون تكسير ريتم،تبديل جو أو حتى كاميرا كاشي..يُمكن أن يكون كلّ شيء إلاّ أن يكون ثورة!و ما أكبر هذه الكلمة أمام صغر عقولنا!

خمسة أشهر كانت كفيلة أن تُثبت أننا قوم نخاف من ظلّنا، أنّنا قوم أمن و أمان و لسنا قوم حريّة و كرامة،أنّنا قوم نفاق و شقاق.. أنّنا قوم "أخطى راسي و أضرب".

و تكلمت الأغلبية الصامتة بكل روح "وطنية": دخّلتوا البلاد في حيط.. خلّوا العباد تخدم.. آقتصاد البلاد.. الموسم السياحي.. يا تونس يا مسكينة.. 

..يعتكفون بيوتهم، ينتظرون على الربوة لمن ينحازون و يصفقون مرة للغنوشي ثم للسبسي فالراعي القادم..

و دخلت تونس التاريخ بأسرع "ثورة" في العالم، ثورة دامت أقل من أشهر، أي نعم أقصر من سيدي رمضان.

عجبي لقوم يزرب و يبلفط حتّى في.. ثـــورة!

و نورمال!

يوم "النصر المشهود" خرج 15 ألف متظاهر في شارع الحبيب بورقيبة من جملة، 3 ملايـــــن من متساكني العاصمة! .. خفّافي و نورمال!

نحلّ التلفزة "الوطنية" باش نضحك (نبكي) على الأخبار نقابل نفس الوجه إلّي نبخّر بريحتو، الوجه إلّي وصف،في ما قبل 14 جانفي،شهداء الوطن بالمخربين و مثيري الشغب !

البلاد تباعة، و ناس لهيتلي في حكايات و جدالات فارغة إلي هيا نعودها "مصطنعة و مقصودة" و إلي تقول هاي يا والدي راهي "تونس" ! ... أخطى راسي و اضرب و نورمال ! ( و نعودها بعقلية أخطاء راسي و اضرب رهو ما يمنع منها راس حد)  

القضأة المستقل متاعنا مسلي عنبي عليه، إلي يرفع قضية في التجمع نلفصولو توهما و نضربوه بعامين حبس، إلي تحيل فمها و تنادي بإستقلال القضاء، تتوقف، دار القضاء كي البرسينغ إلي يدخل مسخ يخرج نظيف.. هذا كل و نورمال !! 

آه لو علم شهداء القصرين و بوزيد أن مكاسب الثورة ستكون فتح عمامو لمواقع البورنو و بعث السفاح فريعة لحزب خاص به و زيارة كلينتون لنا لتلقننا مبادئ "حرية المرأة"، لو علموا لهبّوا من قبورهم صراخا ليعيدوها ثورة كما أرادوها.

ذهب بن علي و زبانيته و بان بالكاشف أن مشكلتنا ليست في بن علي و ليس في رأس النظام ، بل في النضام تغرس في عقول الناس على مدى عقود.. فشعب تربى على الخضوع و الخنوع لن يقوم و لن يثور أبد الدهر حتى و إن قدمت الثروة تتوسل عند قدميه قضاء ا و قدرا.

أهنئ كل سياسي ببلاهة القطيع الذي سيسوقه.و القادم أفضل.. أمام شعب مريض ب"جنون التلحيس".

أبشروا،أبشروا يا من لا تتعلمون من تاريخكم

بعد ثورة علي بن غذاهم .. قام الباي بتعيين خير الدين باشا رئيسا للحكومة .. لكي يمتص غضب الشعب .. لانه كان يقود المعارضة "الاصلاحية" وقتها .. بحكم دراسته في فرنسا..
وقام خير الدين باشا ببعض الاصلاحات وأدخل بعض الفاسدين للسجن وابعد آخرين .. والباي يراقب في صمت .. وقد أرسل الجنرال زروق ليأتيه براس علي بن غذاهم .. بعد أن بردت نار الثورة وانطفأت في صدور الناس .. وانشغلوا بالحصاد والرزق ..
وبعد بضع سنين .. انقلب الباي على خير الدين باشا (الذي هرب لِمصر) .. وأعاد المبعدين .. وكافأ الفاسدين الذين عاقبهم خير الدين ..

الخطير في الأمر كله .. ان خير الدين (الذي تعلم في فرنسا) .. أقنع الباي بالاستدانة من فرنسا .. فأغرق تونس في ديون ضخمة .. واصلاحاته لم تجدي في تجاوز الوضع ..
لان الأموال أنفقت في اصلاحات هيكلية وليس في مشاريع انتاجية .. ما جعل فرنسا تفرض علينا الكومسيون المالي والوصاية ثم انتصاب الحماية و الاستعمار العسكري ..

ما اشبه اليوم بالبارحة .. وما أشبه قائد السبسي (ابن فرنسا) بخير الدين .. وما أشبه الباي بحكومة الظل .. وما اشبه ثورة اليوم بثورة علي بن غذاهم .. وما اشبه محاسبة الفاسدين اليوم بمحاسبة الفاسدين يومها .. وما اشبه الديون يومها وما أدت اليه بديون اليوم وما ستؤدي إليه .. وننظر اليوم للاعتقالات في صفوف الشباب الثائر والمطاردات .. وننتظر راس الثورة مقطوعا بين يدي كمال لطيف وصحبه .. كما فُعل ببن غذاهم .. وننتظر حكومة ترهن تونس وتؤدي بها لـ"كوميسيون" مالي جديد .. وننتظر استعمارا جديدا .. في ثوب إقتصادي

فأبشروا يا من لا تتعلمون من تاريخكم، ثورتكم سرقة أمام أعينكم، في وقت إنشغلكم بالحوارات و المواضيع الجانبية التي ليس لها معنى و لا فأدى لتونس أو مستقبلها، هيا مجرد جدلات فارغة "مصطنعة و مقصودة"، يا أسفي على شعب ينساق وراء كل هذا، و لا يعلم بتاريخه و لا دراية له و لا غاية في بناء الغد فمن ينسى أو يتناسى تاريخه، يأتي التاريخ ليعيد نفسه ..‬

إذا الشعب أراد الحياة.. فلا حياة لمن تنادي

كم أنت لووووول يا شعبي، هذي الكلمة إلي كنت نتصور بونا العزيز بش يلقاها الليلة 

نرجعو التالي شوي قبل 14 جانفي، وقتها كان يحيى هنا الإنسان في الأمن و الأمان.. وقت إلي كان التونسي الحجامة تحكم فيه و الطربلسية يسرقوا فيه، وقت إلي كان التجمع متسلط عليه و البوليس يقمع فيه.. كلنا نعرفو اش كنا عايشين يعني من غير من نعاود لكن فقط تذكير بش تصراً اش عملنا من تغير...

جات "ثورة الياسمين" كيف ما سموها، رغم إنو تبعثر عندي مفهوم "الثورة" بعد 14 جانفي، الواحد تنفس و رجعت فيه الروح و قال التونسي فاق، بش نبنيو تونس جديدة تونس إلي حلمنا بها كل، إلي صبرنا ضحينا على أجلها الكل، و كلنا كنا يد وحدة، وقفة وحدة، روح وحدة.. و بصوت واحد كلنا قلنا "ديقاج"..

مبعد البلاد عرفت انفلات أمني و فوضى "مفتعلة و مقصودة" و فيلم عصابات مسلحة إلخ إلخ.. و خاصةً خلق الفتن، سوى كانت على أسس إختلاف في الفكر أو الأراء الإديوليجية (حرب العلمانيون و أصحاب الفكر الاسلامي) و أيضاً على أساس جهوي و نتذكرو الكل اش صار في القصبة، و أيضاً الصاير توا و إلي نأسف عليه جداً و هي أحداث " المتلوي" إلي هي من رأيي و حسب معلوماتي هي من تحريك النظام البائد و بقايا التجمع الديمقراطي الدستوري "الغير منحل"، إلي رجعلنى تحت مسميات عدة، للذكر و لا للحصر، الوطن، المبادرة، أفاق، المجد.. و أخر المنبثقين من رحم هذا الحزب، "الحزب الحر الدستوري".. و إلي ناس كل استغربت وجود إسم كيف "سيدة الغربي" كعضو في هذا الحزب، لكن نبشركم بإسم أخر و إلي هو "محمد الغنوشي" اظافة إلى العديد من رؤوس الأموال و رجال الأعمال الكبار مثل سي "طارق بوشماوي" إلي هو صاحب شركة من إلي تحمل نفس الإسم، و إلي هو مقرب جداً من العائلة الحاكمة و الطرابلسية (مزلت نقول حاكمة خاطر هذكة الواقع) و إلي هو يمول في الحزب إلي حد الأن بمبلغ 10 مليارات، حسب المعلومات إلي عندي، (و نصوغ الخبر بكل احتراز) لإنجاح الحملة الإنتخبية لحزب في المجلس التأسيسي، و بعد ذلك للملمت شمل كل أطراف الحزب المنقسم..

و زادة ما ننسوش شنو صار في الأربعة الأشهر إلي فاتو، و كلنا شهدنا الأحداث، القمع البوليسي و التعذيب مازل موجود و هو هو و شي ما تغير، من غير ما ننسو طريقة إعلام المهزلة في نقل هذي الأحداث، و محاولة استغباء الشعب و التونسي و تخوفوا كل مرة بفزاعة.. في محاولة للتوجيه الرأي العام و الشارع التونسي..

و عملية "بيع" تونس في "قمة الثماني" و القروض تسدد على مدة 22 عام، يعني بش ترجع تعيش في تبعية طول عمرك، و المشكلة البلاد تباعت وعمال تتدهور على كل المستويات و الشعب في سوبات عميق.. و إنو التونسي ما يحس بها كان كيف يولي يخلص في الخبزة ب300، و باكو الحليب ب1200، ملا شكون بش يخلصها الديون هذي الكل..!

و أيضاً التغير إلي صار في سلك القضاة، هذا كان نجمو نسموه "تغير" و مع " إستقلال القضاة" إلي هو من أصل شوف و شوف ذلك لا يعني إستقلال القضاء.. مع ذلك إنو المسؤولين عن مأساة الشعب هذا و مسؤولين على قتل و تعذيب مئات ومن الشعب التونسي مازلوا يصولوا و يجلو سوى كان داخل أو خارج تراب البلاد التونسية، و فما منهم شكون يدخل الدار القضاء مسخ و يخرج نظيف، على أساس إنو دار القضاء متاعنا ولات كيفها كيف البرسينغ، و زيد من فوق نعطوهم ترخيص احزاب، و منهم إلي رفع علينا قضايا و ربحها مثل سي "سليم شيبوب" و زادة أخر خبر "بونا الحنين" إلي ضلمناه، كيفما ضلمنا المقربين منو، تقلق من " التجاوزت" في حقو و في حق ممتلكتو، إلي هي من دمك و من فلوسك و عرق جبينك يا تونسي.. !! 

الحاصيلو من غير ما ندخلو في تفاصيل طويلة، اش بش نزيد أكثر من هاك.. فقط نحب نهنيكم على "الثورة الميجدة" و على "التغير" إلي قمتو بيه، حتى كان نجمو نسموها "ثورة"، إلي تعبتوا علاها و ضحيتو و إلي على خاطروا شبعتو متراك و غاز و كرطوش و قمع و ذل و إهانة.. و إلي راح من وراها 300 شهيد "خسارة"، و دمعة الأم إلي التو لا كفت، على دم ولدها إلي هو "أمانة" بن إيدك..
إلخ إلخ اش عندي نزيد.. فقط نحب نقول كلمة " نصف ثورة، يعني خراب أمة"